Четиринаесеттиот Фестивал на античка драма Стоби наместо во јули ќе се одржува од 5-ти до 22 септември и наместо на сцената на античкиот театар во археолошкиот локалитет Стоби, ќе се пресели во Народниот театар-Велес.
Ова денеска на прес-конференција го соопшти организаторот на фестивалот – Здружението ФАД Стоби.
Директорот на фестивалот Зоран Љутков рече дека добиле писмо од раководниот тим на Националната установа Стоби дека таму се изведуваат реставраторски работи и поради небезбедност на трибините нема можност да се одиграат претставите.
– Во Стоби се уште интензивно се изведуваат реставраторско-конзерваторските работи, а левата страна од кавејата на амфитеатарот е небезбедна за публиката, истакна Љутков.
Додаде дека, сепак, ако поголемите реставраторски зафати се завршат, очекува барем две до три претстави да се одиграт во Стоби поради барање на бројната публика.
Од организацискиот одбор денеска не сакаа да ги соопштат претставите кои ќе гостуваат на 14-тиот фестивал зашто е можно да има промени поради корекција на термините. Открија дека очекуваат девет или десет претстави, а програмата ќе ја најават на крајот на август.