Започнувајќи од утре, 21. септември па се до 29. септември Струмица ќе биде дел од глобалното светско движење „Еден ден мир“.
Во текот на наредните 9 дена, преку различни активности организаторите ќе се обидат да ја анимимираат струмичката публика со сликање, дизајн, проекции на филмови, изложби, спортски активности, настапи на ди-џеи и концерти, презентации, дебати и други уникатни активности.
Настанот опфаќа и дискусии на најразлични теми од науката, технологијата и глобалниот активизам, можноста за информирање за најновите модели на општествено уредување, глобалното затоплување како ризик или предизвик и многу други дебати, разговори и презентации кои ќе им помогнат на граѓаните да се доближат до темата и материјата сп цел да го промени класичниот модел на размислување и имплементира нови, прогресивни чекори и начини на дејствување. Пред посетителите ќе биде презентирана и независната културна сцена ЈАДРО.
Овој младински и граѓански активизам е поддржан од општина Струмица, а во организација на „Art & Architecture“ Македонија, „100 Hundred Poets for Change“ и „ЕД Планетум“.
„Еден ден може да направи промена, едно човечко суштество може да направи промена, затоа присуствувајте и слободно споделете ги вашите идеи. Нека овие денови се денови на граѓанска акција, на Ваша акција!“ – порачуваат организаторите.