Фатени крадци на дрва во месноста Голеш, кавадаречко, на лице место при товарање на бесправно исечените дрва.
На дрвокрадците им биле одземени две возила во чии багажници имало по еден кубик дрва за огрев.
Случајот со кражба на дрва го потврди Анита Стојковска, портпарол на СВР Велес.
– Крадците на дрва биле фатени во текот на вчерашниот ден, од страна на полициски службеници од полициската станица од Кавадарци, при вршење на контрола за откривање на шумски кражби кај месноста викана Голеш кај Тиквешкото Езеро. Приведени се две лица од кавадаречкото село Возарци. Од нив се одземени два патнички автомобила во кои имало натоварено околу 2 кубни метри дрва за огрев и една моторна пила, информираше Стојковска.
Одземените дрва со потврда се предадени на шумска полиција. Против сторителите ќе следи соодветна пријава.
– Инаку изминатиов период на целата територија на Секторот за внатрешни работи Велес редовно се спроведуваат контроли во врска со оваа проблематика. Веќе имаме неколку случаи каде се одземени патнички автомобили и огревни дрва, за што има процесуирано и поднесоци до надлежното обвинителство, додаде Стојковска.
Таа нагласи дека полициските службеници и во иднина ќе вршат контроли со откривање на шумски кражби заради сузбивање на оваа појава.