Главниот батлер во Елисејската палата е уапсен под сомнение за кражба на вредни садови и порцелан, а потоа обид за продажба преку интернет. Тој е едeн од тројцата уапсени во скандалот што ја потресе официјалната резиденција на францускиот претседател, а украдените предмети се проценуваат на вредност од 40.000 евра, објавува „Гардијан“.
Истражителите уапсија еден маж и двајца соучесници. Властите беа известени за исчезнувањето на предметите, од кои некои се сметаат за национално богатство. Повеќето од парчињата доаѓаат од познатата фабрика за порцелан „Севр“ во Париз, која е во државна сопственост од 1759 година. Истрагата беше покрената откако вработените во фабриката препознаа некои од исчезнатите предмети на веб-страници за онлајн аукции како што е „Винтед“.
Според истражителите, на сметката на осомничениот за продажба во „Винтед“ имало тањир со печат „Француски воздухопловни сили“ и пепелници означени со „Манустека Севр“, предмети што вообичаено не се достапни за јавноста. При претрес на неговиот дом, возило и личен шкаф пронајдени се околу сто предмети, вклучувајќи порцелан „Севр“, статуа од Рене Лалик, чаши за шампањ „Бакара“ и бакарни садови.
Улогата на главниот батлер вклучува грижа и одржување на приборот за јадење што го користат претседателите и достоинствениците. Обвинителите рекоа дека инвентарните листи што ги водел уапсениот батлер сугерираат дека тој планирал идни кражби.
