Словенечната европратеничка Тања Фајон смета дека е жално што Македонија постојано е заградена со историски прашања и спорови. По најавите за вето на декемврискиот Самит на Европската унија, овојпат од страна на Бугарија, а поради обвинување за крадење на бугарската историја, Фајон во изјава за дописникот на МИА од Брисел вели дека живееме во време во кое повеќе од било-кога се потребни добрососедски односи и доверба.
– Јас апсолутно не поддржувам понатамошна блокада на пристапниот пат на Македонија кон Европската унија, бидејќи земјата веќе предолго чека. Токму на почеток на преговорите со Унијата гледам како на дел од решението. Очекувам Софија и Скопје преку искрен разговор да ги смират неодамна појавените тензии, вели Фајон.
Според една од најактивните и најпопуларни пратенички во Европскиот парламент, четврта година по ред е загубена за Македонија и понатамошна изолација на земјата очигледно ќе го отвори патот за уште поголема националистичка и популистичка реторика.
– Крајно време е да започнат пристапните преговори со ЕУ и да се најде итно решение за отворените билатерални прашања. Какво било одложување на почетокот на преговорите е лошо како за Македонија, така и за регионот и воопшто за Европската унија. Не мислите дека преговорите ќе донесат стабилност и напредок? – прашува Фајон и самата одговара дека токму одложувањето на пристапните преговори ќе ја оттргнат земјата од овие благодети, потенцирајќи дека веќе сме сведоци на таквиот процес на нестабилност и несогласувања.