Во европските институции не постои договор за промената на механизмите на Шенген зоната и со тоа на механизмот за времена суспензија на безвизниот режим, откако во декември пропаднаа преговорите меѓу Европскиот парламент и Европскиот совет.
Според словенечката европратеничка Тања Фајон, „единствена можност за да се вратат визите е да се менува целото европско законодавство, со што ќе се вратат земјите на црната шенген листа. Тоа е долга процедура која трае повеќе од една година“.
Таа смета дека до тоа нема никогаш да дојде, бидејќи тоа е сериозно политичко прашање, додека механизмот за суспензијата е привремена мерка.
– Ако дојде до враќање на визниот режим тоа би било големо враќање назад за сите. Безвизниот режим и слободното движење на граѓаните е основно човеково право и се надевам дека тоа нема да биде ставено во прашање, ниту во ЕУ ниту за земјите кои сега се на патот кон ЕУ, истакна Фајон.
Според неа, во европските институции се уште нема договор за промена на механизмите на Шенген зоната. Што значи дека за граѓаните од Македонија и другите земји од Западен Балкан, барем засега не постои опасност за укинување на безвизниот режим.
– Донесувањето на механизмот за суспензија на безвизниот режим нема да биде брзо бидејќи во декември пропаднаа преговорите меѓу Европскиот парламент и Европскиот совет и ние сме на почетокот на новите преговори, додаде европратеничката.
Брзината на донесувањето на овај договор и на самиот механизам, според Фајон, ќе зависи од работата на ирското претседателство.
Во однос на бранот на азилантите кои доаѓаат во ЕУ од Балканот, посебно во Германија, Фајон смета дека најдоброто решение е Германија да ја скрати процедурата за давање азил, како некои други земји со што тие сега имаат помалку проблеми со азилантите.