Офицери – ветерани на армиите и на државните безбедносни служби од Македонија, Албанија, Бугарија и Србија в сабота во Охрид ќе ја одржат „Езерската средба“, на која ќе учествуваат и градоначалници на повеќе општини од регионот на Охридското и Преспанското Езеро.
Манифестацијата „Езерска средба – Охрид 2018“ се одржува во соработка со локалната самоуправа од Охрид и под покровителство на градоначалникот Јован Стојаноски, а по повод одбележувањето десетгодишнината од делувањето на Општинската организација на Здружението на ветераните од одбраната и безбедноста во земјата и на меѓународен план.
Како што беше најавено на денешната прес-конференција централниот настан на манифестацијата ќе биде Свечената седница, на која ќе учествуваат високи претставници на сродните национални асоцијации од Република Бугарија и Република Албанија, претставници на партнерски асоцијации, ветераните од одбраната и безбедноста од Софија, Ќустендил, Дупница, Тирана, Пешкопеја, Елбасан, Поградец, Корча и Берат.
– Здружението на ветераните од одбраната и безбедноста е непартиско и невладино, мултинационално, со околу 1.400 членови. Наша заложба е проширување на ограноците и во други градови од Република Македонија, изјави Филип Котели, генерал во пензија и претседател на Здружението на ветерани од одбраната и безбедноста на Републка Македонија.
Манифестацијата ќе биде искористена за промоција на Охрид, како и за потпишување Повелба за соработка со офицерите – ветерани од албанскиот град Берат, што исто како и Охрид е на листата градови заштитени од УНЕСКО.