Членовите на Иницијативата за внатрепартиски реформи во ВМРО-ДПМНЕ Александар Михајлоски, Петар Богојески, Костадин Богданов и Драган Лазаров беа на работни состаноци воЕвропскиот парламент во Брисел, Белгија и остварија повеќе средби со политичари од Европскиот парламент.
Во изминатите два дена, претставниците на Иницијативата остварија низа средби со членови на Европскиот Парламент од Европската Народна Партија (ЕPP), која е воедно и најголемата група во Европскиот Парламент и сестринска партија на ВМРО-ДПМНЕ. На средбите беше презентирана новата Декларација „Европско ВМРО-ДПМНЕ за Европска Република Македонија“ и Декларацијата за демократизација и модернизација на ВМРО ДПМНЕ, како визија за промовирање на вистинските демократски вредности во ВМРО-ДПМНЕ и нејзино зајакнување, како и силни заложби и поддршказа Евроатлантскиот пат на Република Македонија.
„Средбите што ги имавме во Брисел ја покажаа поддршката која ја имаме, не само меѓу членството во ВМРО-ДПМНЕ, туку и кај политичарите од сестринските партии во Европа. Оваа поддршка недвосмислено кажува дека партијата треба да се реформира како предуслов за деизолција и враќање на угледот на ВМРО ДПМНЕ, кој во изминатите години беше нарушен со погрешни политики”, рече Александар Михајлоски.
Констатираме голема поддршка за унапредување и модернизирање на ВМРО-ДПМНЕ низ реформските процеси кои следуваат, а ќе придонесат Европската Народна Партија повторно да има силен партнер во Република Македонија.Во наредниот период таа поддршка и јавно преку пораки и настапи ќе биде дадена на Внатрепартиската инцијатива за реформи, со цел Македонија забрзано да се придвижи кон членство на ЕУ и НАТО, бидејќи на Македонија и треба силна, проевропска и конструктивна ВМРО-ДПМНЕ, се вели во соопштението на претставници на Внатрепартиската иницијатива за реформи во ВМРО-ДПМНЕ од посетата на Европскиот парламент во Брисел, Белгија.
