Европратеници – силни поддржувачи на интеграцијата на Македонија во Европската Унија, од денеска, на покана на министерот за надворешни работи Никола Попоски, ќе престојуваат во дводневна посета на Република Македонија.
Во состав на делегацијата од Европскиот Парламент ќе бидат: претходниот претседател на Европскиот Парламент Јержи Бузек (EПП, Полска), Туне Келам (EПП, Естонија), Мирослав Миколашик (EПП, Словачка) и Ласло Токес (EПП, Романија).
Покрај средбата со министерот Попоски, утре, како што е наведено во соопштението од МНР, предвидено е европратениците да остварат средби со претседателот на Република Македонија Ѓорге Иванов, со премиерот Никола Груевски, со вицепремиерката задолжена за европски прашања Теута Арифи, како и со пратеници во Собранието на Република Македонија.
Во фокусот на разговорите со европратениците ќе биде напредокот на Република Македонија во исполнувањето на критериумите за членство во Европската Унија, особено во клучните реформски области кои се предмет на интерес за пролетниот извештај на Европската Комисија за Република Македонија.
На средбите се очекува да стане збор и за тековните активности на Република Македонија за унапредување на односите со соседите и регионалната соработка. Се очекува да се разменат мислења и за нацрт-Резолуцијата на Европскиот Парламент за напредокот на Република Македонија за 2012 година на известувачот Ричард Ховит, чие второ читање во Комисијата за надворешни работи на Европскиот Парламент треба да се одржи кон крајот на овој месец.
Европратеникот Јержи Бузек за време на престојот во Македонија ќе одржи и предавање во Дипломатската академија на Министерството за надворешни работи на тема: „Европскиот Парламент – движечка сила на политиката на ЕУ за проширување и на амбициозната соседска политика“.