По повод прес-конференцијата на Тевдовски од Министерството за финансии посочуваат:
Најрелевантниот извор, европската статистика Еуростат го демантира Тевдовски. Согласно Еуростат македонскиот државен долг е меѓу најниските во Европа. Двојно е помал од европскиот просек, а во регионот само Бугарија има помал долг од Македонија. Така ако државниот долг на Македонија по издавањето на еврообврзницата изнесува 41,9%, на Црна Гора е 61,8%, на Албанија 69,8%, на Србија 71,9%, на Словенија 82,3%, на Хрватска 84,5%, а на Грција 179,2%.
Интересно е што сите споредби СДСМ ги прави со 2008 година – историско најниското ниво на долгот кој го постигна оваа Влада, а не со состојбата од 2005 година која ја остави нивната влада. Две милијарди евра или скоро половина од долгот на државата се оставени од владата предводена од СДСМ – на кои капитални проекти се потрошени тие кредити?
Оваа Влада зема 350 милиони евра кредит од ЕИБ за да ги поддржи малите и средни претпријатија во време на светска економска криза. Зема кредит за да ја изгради инфраструктурата во земјава, три автопати, да се реконструира и изгради железницата во која со децении не се инвестирало, да се изградат болници, училишта градинки. Сето ова се капитални добра кои креираат нови работни места, го придвижуваат економскиот раст и создаваат трајни вредности за граѓаните. Од тој аспект – зошто секогаш кога СДСМ зборува за државниот долг заборава да го спомне фактот дека за овие десет години бруто домашниот производ, кој е најрелевантен фактор за економскиот развој на земјава, е удвоен.