Ние сме загрижени за политичката ситуација во земјата, начинот на кој овие настани за време на викендот беа спроведени и недостигот на балансирана медиумска покриеност на настаните, што само ги зголеми нашите грижи, пренесе МИА.
Сигурна сум дека знаете дека нашата загриженост за зголемената политизација и перцепција за селективна правда е исто така изразена во редовниот извештај на Еврокомисијата, издаден на крајот на минатата година. Според нас, најважно е истрагата да биде спроведена независно и транспарентно, имајќи го предвид целиот процес и начелото на пресумпција на невиност, истакна денеска портпаролката на Европската комисија, Маја Коцијанчич.
Реакцијата на ЕУ за три дена е втора по ред за случајот „Пуч“, откако во саботата навечер, Европската служба за надворешни работи (ЕЕАС) побара почитување на правата на обвинетите во случајот и пресумпцијата на невиност, денеска, Коцијанчич во име на официјален Брисел ја искажа загриженоста за политичката ситуација во Македонија.
Гласноговорничката на Високата претставничка за надворешна и безбедносна политика на Унијата, Федерика Могерини, Коцијанчич, потсети дека и во саботата, веднаш откако беше обелоденет случајот „Пуч“ во Македонија, ЕУ изрази загриженост за настаните во Македонија.
– Сакам да потсетам дека во изјавата потсетивме дека очекуваме праведна, независна и транспарентна истрага во случај на било какво наводно погрешно работење, со целосно почитување на правата на обвинетите во согласност со правото и меѓународните стандарди, вклучувајќи го и принципот на пресумпција на невиност – повтори Коцијанчич.
Портпаролката на Еврокомисијата додаде дека засега, како што стојат работите, останува планот за еврокомесарот за соседство и преговори за проширување, Јоханес Хан, на 16-ти овој месец да го посети Скопје, што ќе биде прва негова посета на Република Македонија, откако тој го презеде ресорот од Чехот, Штефан Филе.
– Досега нема промени во планот за посета на комесарот Хан на земјата, но се разбира дека одблиску ќе го следиме развојот на настаните и ќе ве информираме, посочи Коцијанчич.