Општина Битола почна да расчистува голема депонија во Нова Битола која се наоѓа во непсоредна близина на градскиот реонски пазар.
За чистење на депониите во градот ќе бидат вклучени сите јавни комунални претпријатија чиј основач е општината, најави градоначалничката на Битола Наташа Петровска.
– Убедена сум дека граѓаните ќе бидат задоволни од оваа акција, но нашата намера е во текот на целата седмица да ги расчистуваме депониите, да засадуваме нови садници и да извршиме зарежување на дрвја каде тоа е потребно. Денот на пролетта ние нема да го одбележуваме само во еден ден од годината туку континуирано, истакна градоначалничката Петровска.
На денешниот јавен еко-настан, ЈП „Комуналец“-Битола упатија јавна покана до граѓаните да пријавуваат потреба од интервенирање и собирање на крупен отпад, како и на електронски отпад, за што екипите на локалниот комунален сервис веднаш ќе излезат на терен.
