Европската комисија го утврди 16. октомври како ден кога ќе биде издаден новиот извештај за напредокот на Република Македонија во европските интеграции и се очекува тој да содржи нова, петта по ред препорака до Европскито совет за отворање на преговорите за членство на земјата во Европската унија.
Од канцелаирјата на комесарот за проширување, Штефан Филе, каде наголемо се подготвува извештајот, денеска за дописникот на МИА од Брисел потврдија дека на 16-ти октомври ќе биде издаден извештајот за Македонија, дека веќе првите драфт-верзии се направени, но дека е отворен и ќе се дополнува и модифицира се до крајот на септември месец.
– Засега, единствено официјално можеме да потврдиме само дека новиот прогрес-извештај за вашата земја, комесарот Филе ќе го презентира на 16-ти октомври на прес-конференција во Брисел, не информираа од кабинетот на еврокомесарот за проширување.
Според информациите, новиот извештај, и покрај притисоците на Грција и Бугарија, сепак, ќе содржи нова, заслужена петта препорака на Комисијата до Европскиот совет за одредување на датум за почеток на пристапните преговори со Македонија. За разлика од претходно, сега Комисијата подготвува и голем број забелешки во неколку области, пред се за апсењето и третманот на новинарот Томислав Кежаровски и поопширен опфат на собраниските инциденти од 24 декември минатата година.
Но, затоа, пак, по успешниот договор на министерот за информатичко општество и администрација Иво Ивановски со претставничката на ОБСЕ за слобода на медиумите Дуња Мијатовиќ, се очекува да донесе позитивни критики за законот за медиуми, а до лиферувањето на извештајот се очекува и позитивен исход од Комисијата за истраги на собраниските инциденти, со јасни препораки и имплементација на заклучоците од страна на властите во Македонија.
Како што е познато, изминатите четири години, Европската комисија издаваше позитивни извештаи со препорака до Советот за одредување датум за почеток на преговорите на Република Македонија со Европската унија, но поради блокадите на Грција, а во последно време и на Бугарија, нашата земја, која осум години е кандидат за членство, не го добива заслуженото на самитите на ЕС.