За два до три часа се очекува нивото на реката Вардар во Велешкиот регион да нарасне. Подрачното одделение на Дирекцијата за заштита и спасување е на терен и, како што информира, заедно со локалната самоуправа ја следи состојбата.
Информирано е и населението, а Општина Велес има ангажирано машина во Башино село за расчистување на речните наноси и расчистување на речното корито околу мостот во селото.
Преку Дирекцијата се ангажирани градежни машини за справување со непогодите – во Штип багер за правење одбранбени насипи и расчистување, во Карбинци уште две машини, во Конче – Радовиш утоварна лопата и камион, во Крива Паланка една градежна машина. Во Ново Село Штипско се поставени 1.000 вреќи за да се спречи натамошно продирање на водата, додека во Гевгелија е поставена цистерна со питка вода во случај да е загадена водата во водоводот.
Во Куманово излеаната вода е стигната до меморијалниот споменик на АСНОМ во Пелинце.
Дирекцијата за заштита и спасување преку своите подрачни одделенија ја следи состојбата во земјата, постојано контактира со локалната самоуправа и е подговена, ако има потреба, да активира дополнителна механизација за отстранување на последиците од врнежите.