Претседателот на Собранието Талат Џафери денеска се сретна со поранешниот хрватски претседател Стипе Месиќ кој присуствуваше на одбележувањето на 15-годишнината од трагичната смрт на поранешниот претседател Борис Трајковски.
Собраниската прес-служба информира дека Месиќ го пофалил чекорот што го презела државата со потпишувањето на Преспанскиот договор со кој се овозможило деблокирање на евроатланските интеграциски процеси, односно се отворил патот кон полноправно членство во НАТО, кое според најоптимистичките предвидувања, би се случило кон крајот на јуни годинава, како и патот кон добивање датум за отворање на пристапните преговори со ЕУ.
Џафери го информирал соговорникот дека во тек е ратификацијата на Протоколот за пристапување во НАТО во националните парламенти и оти досега тоа го сториле Словенија, Албанија, Бугарија, а при крај на неделава се очекува тоа да го направат и Црна Гора и Хрватска.
Двајцата соговорници ја потенцирале важноста од зајакнување на економската и трговска соработка меѓу земјите во регионот.
