Лекарите на Клиниката за инфектологија регистриралее уште еден лабораториски потврден случај на инфекција со вирусот на Западен Нил, кај дете на двегодишна возраст.
До вчера, во Македонија се пријавени седум случаи на лабораториски потврдени инфекции со вирусот на Западен Нил, а тројца граѓани починале, информираше МИА.
Двете починати лица се на возраст 53 и 83 години и имале други хронични заболувања во својата медицинска историја, а едното е 2,5 годишно дете, без претходен коморбидитет. Освен едно заболено лице кое има историја на повеќе еднодневни патувања во соседна Грција, останатите не дале податок за патување/престој надвор од Македонија во критичниот период на заразување.
Сите пријавени случаи на инфекција со вирусот на Западен Нил се лабораториски докажани во вирусолошката лабораторија при ИЈЗ – Скопје.
Западно Нилската треска е заболување кое не подлежи на задолжително пријавување согласно законската регулатива во Македонија, но согласно одредбите на Меѓународниот Здравствен Правилник, за појавата на случај на заболување на Западно Нилска треска, поради сериозните последици по јавното здравје и можноста за меѓународно ширење на заболувањето, редовно се известува СЗО како и Европскиот Центар за Контрола и Превенција на Болестите.