Две лица се потешко повредени во судирот на моторна дрезина за поправка на пруги и автомобил „Опел корса“ со тетовски регистарски таблички што околу 14 часот и 10 минути се случил денеска на див железнички премин кај тетовското село Ратае, информираше портпаролот на СВР Тетово Марјан Јосифовски.
Моторната дрезина се движела од правец на Тетово кон Скопје додека во автомобилот биле возачот А.Е (1978) и Б.Е. (1951) и двајцата жители на Шемшово. Од ударот тие се здобиле со телесни повреди по што со возило се префрлени во тетовската клиничка болница.
Полицијата врши увид на самото место и работи на откривање на причините за сообраќајката.
– Иако бројот на сообраќајни несреќи на железничката пруга низ Тетовско е намален во однос на минатите години, тие и понатаму се случуваат најмногу на дивите железнички премини кај Ратае, Џепчиште, Фалише и на уште неколку други места во регионот, рече Јосифовски.