Компаниите Hinkel International GmbH, Alzey од Германија и АSА International Environmental Services GmbH Hinberg од Австија се двете пријавени за концесија за регионалната депонија за комунален цврст отпад во Полошкиот регион.
На состанокот на Комисијата за спроведување на постапката за доделување на концесија за финансирање, проектирање, изградба и управување со регионална депонија за комунален цврст отпад во Полошкиот регион во просториите на Центарот за развој на Полошкиот плански регион во село Џепчиште денеска на отворањето на понудите присуствуваше министерот за животна средина и просторно планирање, Абдилаќим Адеми.
Со доделувањето на концесијата, според Адеми, ќе се овозможи приватниот сектор да инвестира во подобрувањето на состојбите со управување со отпадот во овој регион.
– Со инвестицијата во затворање на постојната депонија во Русино и изградбата на нова санитарна регионална депонија со придружни објекти за преработка на отпадот ќе се обезбеди граѓаните во овој регион да добијат услуга што е во согласност со европските стандарди и соодветно ќе се заштити животната средина, рече Адеми.
Како што соопшти Министерството за за животна средина и просторно планирање, Адеми изразил убедување дека постапката ќе заврши успешно, а Комисијата ќе ја изврши максимално брзо и одговорно својата задача, со што на идниот концесионер ќе му се овозможи во скоро време да започне со работа.