Поминаа два месеци од бегството на поранешниот директор на УБК, Сашо Мијалков, а предметот и натаму во предистражна постапка. Додека обвинителката Ленче Ристовска се обидува да дознае каде бил, дали и кој му помогнал да избега, кој му бил планот – Мијалков заврши во затворот во Шутка, каде ќе остане се до правосилноста на пресудата за случајот „Трезор“.
Од крајот на февруари, до сега, обвинителката Ленче Ристовска за бегството на Мијалков сослушала повеќе од 30 лица, меѓу кои, и самиот него, Вилма Русковска и истражителите кои го лишија од слобода кога тој сам се појави пред Обвинителството за гонење на организиран криминал и корупцја. Распитите треба да откријат детали за бегството.
„Издадени се повеќе наредби за обезбедување докази. По анализа на целокупните вербални и материјални докази ќе биде донесена јавнообвинителска одлука“, велат од Обвинителството.
Како што дознава „А1он“, неофицијално, меѓу доказите има видео материјал од надзорни камери поставени на објекти, снимки од камерите поставени на раскрсници, листинзи од телефонски повици земени од мобилните оператори. Нивната анализа, треба да даде одговор дали и колку лица се вмешани во бегството. Пред два месеци, по пресудата за „Таргет-Тврдина“, обвинителката Ристовска кажа дека не знаела каде бил Мијалков и да се надева дека тоа ќе го утврди истрагата.
Мијалков веќе два месеци издржува притвор во затворот во Скопје“ во Шуто Оризари.