Два камиона, еден со грчки и еден со македонски регистраски ознаки, синоќа во 19:45 паднале во провалија кај Градец во близина на Демиркаписката Клисура. Возачите на камионите се полесно повредени.
Според првичните сознанија на полицијата, која изутринава врши увид, причина за излетувањето на камионите бил подмрзнатиот коловоз на патот Демир Капија – Удово.
Два камиона и еден автобус ноќеска се излизгале од коловозот и на автопатот Скопје – Велес, кај Катланово. Нема повредени лица.
Сообраќајот на автопатот Скопје-Велес-Гевгелија денеска се одвива без застој, но отежнато поради опасност од појава на голомразица на осојничавите места.
АМСМ синоќа предупреди на внимателно возење на патните правци Градско-Велес и Демир Капија – Удово поради многу ниските температури и подмрзнувањето на коловозот.
„Македонија пат“, пак, препорача доколку мора де се користат овие патни правци да се вози внимателно и со приспособена брзина.