Активисти со жолт спреј ги обележаа дупките во асфалтот на патот кон Средно Водно.
Граѓаните преку Твитер побараа од Град Скопје да се погрижи за асфалтирањето на дупките кои велат дека изгледаат како вулкански кратери.
Дупките во асфалтот на патот кон Средно Водно утрово осамнаа внимателно исцртани со жолта боја во знак на протест за нивно санирање.
Од Град Скопје веднаш одговорија дека патот од Средно Водно до Горно Нерези е регионален пат и не е во нивна надлежност.
„За истиот треба да се грижи јавното претпријатие за државни патишта. Што е до нас, ќе алармираме за ова до надлежната институција“, велат од Град Скопје.
Тие појаснуваат дека паркингот на Средно Водно е во надлежност на градот и средствата од наплатата на тој паркинг се наменети за зазеленување на Водно.
„Тоа не го менува фактот дека патот е регионален и за него е одговорна друга институција што е токму за тоа, одржување на регионални патишта“, велат од Град Скопје.