Лидерот на ДУИ, Али Ахмети во партиското седиште во Тетово прогласи голема победа на партијата во Тетово, Струга, Чаир, Дебар,Сарај, Липково, Долнени, Теарце, како и во Пласница, Кичево во првиот круг.
Тој им се заблагодари на сите гласачи за нивниот придонес во оваа голема победа на ДУИ и за добените мандати за следните четири години на градоначалниците.
– Сигурно дека при ваквата голема победа има одредени изгубени битки, но тоа не значи дека е изгубена целата војна, како што е случајот со Гостивар, каде што во водство е другиот кандидат, но и од каде се уште се чекаат последните резултати за да се утврди точно кој е победникот, рече Ахмети.
Тој посочи дека ДУИ е голема партија и така што и во случаите во оштините Врапчиште, Желино и Боговиње, каде победил еден од другите кандидати ќе им помага, како што им помагал на неговите кандидати.
– Тоа сме го правеле во минатото и тоа ќе го потврдиме во иднина. Ова е победа за сите граѓани и тие што ги гласаа нашите кандидати и тие што не ги гласаа, но идните градоначалници ќе придонесуваат за сите граѓани и затоа им посакувам здравје, успех и реализирање на програмата што ја ветија пред граѓаните, рече Ахмети.
Кандидатката на ДУИ за градиначалник на Тетово, Теута Арифи им се заблагодари на ДУИ за поддршката за уште еден четиригодишен мандат за оваа функција.
– Сакам да им се заблагодарам на нашите активисти, но и на граѓаните кои на овие избори ја оценија нашата завршена работа и завршени проекти и ветувам дека и во идниот мандат ќе работам за сите граѓани без разлика на етничка и политичка припадност, рече таа.
Арифи додаде дека Тетово втор пат гласа за жена и вети дека отворено и чесно ќе работи на реализирање на тоа што беше понудено во кампањата.
– Во следните четири години ќе работиме на заеднички проекти за да покажем дека Тетово што го сакам е вредно за тоа, рече таа.
ДУИ вечерва по изјавите на Ахмети и Арифи ја почна изборната победа и во самото седиште, но и надвор од него со тапани, свирење на автомобили, скандирање.