Лидерот на ДУИ, Али Ахмети, денеска на партиски собир во Скопскиот саем, го назначи Беким Незири, актуелениот министер за економија, за шеф на Централниот изборен штаб за вонредните избори закажани за 24 април, идната година.
– Македонија е во многу тешка криза и ние во ДУИ ја гледаме како можност за создавање на подобра иднина. Македонија е во момент на пресврт кој може да донесе решение за големите проблеми што ја мачат државата. Нашата партија од случувања оваа година излезе посилна. Создадовме доверба кај младите дека и во Македонија е можна иднина и благосостојба и не мора да ја бараат среќата надвор, рече Ахмети.
Незири истакна дека сите изборни штабови, од централниот до тие на локално ниво, кои бројат околу 15 илјади активисти, се подготвени за победа на ДУИ на наредните парламентарни избори.
На партискиот собир беа промовирани и претседателите на 34 општински штабови со околу 1.000 членови кои добија и насоки за работа.
На претходните избори шеф на Изборниот штаб на ДУИ беше министерот за образование и генерален секретар на партија Абдулаќим Адеми.