Охридскиот договор е единствениот пат кој помага за членство на Македонија во НАТО и во ЕУ, изјави денеска на прес-конференција Муса Џафери, член на Централниот одбор на ДУИ, кој посочи на детали за тематскиот конгрес на партијата што ќе се одржи на 28 и 29 март во Скопје.
Една од панел-сесиите на конгресот е добро владеење и консензуална демократија, односно колку помагаат во стабилизирањето и демократизацијата на Охридскиот договор.
– Овој договор, односно, Уставот, како што уште го нарекуваме од 2001 година, според сите анализи, е единствениот пат кој помага кон членството во НАТО и ЕУ. Нашата констатација е дека „авторството” на Уставот на РМ е заедничко со одлучните центри, како што се Брисел и Вашингтон. Од ова произлегува дека помошта, олеснувањето и интервенцијата од страна на овие два центри во актуелната ситуација е соодветна на прелиминарните состојби кои биле од 2001 година до денес, рече Џафери.
Во однос на добро владеење, рече вицепремиерот Џафери, ДУИ ќе инсистира и тврди дека на Македонија и треба консензуална демократија во комбинација со Бадентеровиот принцип.
– Акцентот се става на праведно и рамноправно распределување на јавните финансии-буџетот. Поделбата на власта врз основа на принципот на соодветна и правична застапеност на сите нивоа на државата, децентрализација соодветна на околностите на Македонија, што значи еднаков територијален развој и втората деценија на спроведувањето на Охридскиот договор, изјави Џафери.
На тематскиот конгрес ќе има три панели и тоа евроатланските интеграции и доборсоседството, добро владеење и консензуална демократија и економски развој и еднакви можности.