Настаните во и надвор од зградата на Собранието на Република Македонија не придонесуваат во правец на заедничките определби на сите политички партии и на граѓаните на Република Македонија. Сметаме дека политичките разлики и спротивставувања на ниту еден начин не смеат да ги загрозуваат основните функции на државата, како и благосостојбата и мирот на граѓаните во земјата.
Ова се наведува во реакцијата на Демократската унија за интеграција за вчерашните случувања по повод донесување на буџетот за кои се изразува, како што се наведува, длабока загриженост.
– Донесувањето на буџетот е еден од основните предуслови за функционирање на државата и затоа сметаме дека овој есенцијален документ не смее да биде алатка за дневно политичко поткусурување и добивање на политички поени, стои во денешното соопштение.
Според партијата, загрозувањето на основните функции на државата и институциите на системот е во директна спротивност со јасните препораки на Советот на министри на ЕУ, првото тримесечје од 2013 ексклузивно да се посвети на динамизирање на реформите и решавање на споровите, со цел во јуни 2013-та да се отворат пристапните преговори за во ЕУ.
Од ДУИ воедно со апел до политичките партии од македонскиот опозициски блок „Сојуз за иднината“ да ги спуштат тензиите, а со цел да се создаде амбиент за продолжување на реформите согласно препораките на ЕУ. ДУИ ќе се ангажира максимално со целиот свој капацитет во правец на надминување на новонастанатата ситуација во Собранието на Македонија, се вели во соопштението.