Демократскиот сојуз ги повикa членовите и симпатизерите на партијата и сите останати граѓани в недела на 27 април да излезат на гласање и да гласаат за кандидатите за пратеници на „Коалицијата за подобра Македонија“ предводена од ВМРО-ДПМНЕ, како и за претседателскиот кандидат Ѓорге Иванов.
– Демократскиот сојуз е цврсто определен за зголемување на правната сигурност и владеење на правото, силни демократски институции, подинамичен економски развој и отворање нови работни места, еднакви можности и шанси за сите, самостојност на судскиот систем, слободни медиуми кои се борат за вистината, како и ефективна борба против организираниот криминал и корупцијата. За ДС врвни приоритети се полноправно членство во НАТО и започнување на преговорите за влез во ЕУ, истакна на денешната прес-конференција претседателот на ДС Павле Трајанов.
Побара гласачите да и обезбедат на „Коалицијата за подобра Македонија“ стабилно парламентарно мнозинство од 62 пратеника за, како што рече, да можат да се реализираат стратешките определби и цели и да се имплементираат над 2.000 проекти, и да се отворат 64.000 нови работни места.
– Република Македонија е поставена на цврсти темели, спроведени се бројни реформи, при што со многу посветеност и работа постигнати се значајни резултати. Развојот и позитивните трендови треба да продолжат. Со масовна поддршка и гласање за „Коалицијата за подобра Македонија“, се гласа за стабилна и економски силна Македонија и се отвораат нови перспективи за сите граѓани, посочи Трајанов на прес -конференцијата.