Организацијата на резервни офицери на Македонија (ОРОРМ) во соработка со основната организација од Велес и логистичка поддршка со претставници од гарнизонот на АРМ од Велес, со одобрение на ГШ на АРМ и Министерството за одбрана, денеска на полигонот на АРМ во околината на Велес, кај Долно Оризари го одржа традиционалниот државен натпревар во гаѓање со пиштол 7,62м.м.
Претседателот на ОРОРМ проф. д-р Ѓорѓи Малковски за МИА изјави дека целта на овие натпревари е да се овозможи воено и стручно оспособување на резервните офицери и подофицери во гаѓање со пиштол.
– Ова е место за резервните офицери кои немаат свои вежбалишта да ги проверат своите знаења во пракса и воедно да си ја проверат стручноста како резервни офицери и подофицери во АРМ, појасни Малковски.
Инаку на натпреварите помеѓу 12-тина екипи на ОРОРМ од општинските организации од цела Македонија, екипно првото место во гаѓање со пишто го освои екипата од Скопје во состав: Дејан Станковски, Христијан Николоски и Киро Трајановски, втора е екипата од Свети Николе, а трета екипата од Кичево.
Првото место поединечно со одлични 47 круга од можни 50 и припадна на Валерија Ванева од екипата на Свети Никола, втор е Зоран Мирчевски од Кичево со 41 круг, а трета Ивана Начарова од Скопје со 40 круга.
Наградите и признанија им беа доделени на свеченост во велешката касарна.