Фејсбук страницата „Другата страна на политиката“ објави принт скрин од поканите кои преку „фејсбук“ биле испратени до тројцата претседателски кандидати. Оттаму ги демантираат тврдењата дека Пендаровски не бил поканет.
„Уште еднаш сакаме да го истакнеме нашиот концепт надвор од класичната политичка кампања, односно нашиот неутрален пристап при претставувањето на другата страна на политиката. Во таа насока се оградуваме од сите политички контексти и поврзување со политички субјекти. Воедно, како одговор на одредени обвинувања на наша сметка, во прилог ги приложуваме поканите за интервју упатени до сите претседателски кандидати“, пишува на „Фејсбук“.
Претходно, на „Фејсбук“ беше објавено кратко видео интервју од двајцата претседателски кандидати Гордана Сиљановска Давкова и Блерим Река каде говорат за приватниот живот. За видеото се пофали Сиљановска на својот „Фејсбук“ профил, а од штабот на Река демантираа дека тие го нарачале видеото и дека двјцата кандидати го снимиле заедно. Од штабот на Пендаровски негираа дека добиле покана, а и самиот тој на Твитер напиша дека до него не стигнала покана за снимање на видео.
