Претседателот на националната секција ИПА, Робертино Ацевски информираше дека е направена набавка на лична опрема како заштитни ракавици, маски и антибактериски гелови за 900 припадници на полицијата. Тој нагласи дека покрај таа бројка полицијата ќе обезбеди заштитна опрема и за сите други колеги ширум земјата.
Од претставниците на меѓународната полициска асоцијација беше соопштено дека донацијата во форма на заштитна опрема ќе биде поделена во вкупно 17 полициски станици вклучувајќи го и граничниот премин Блаце.
Техничкиот министер за внатрешни работи, Чулев изрази благодарност за донирањето на заштитната опрема за полицијата.
Тој соопшти и дека во меѓувреме е распишан тендер за набавка на заштитна опрема за полициските службеници и дека се очекува таа наскоро да пристигне. Министерот нагласи дека на подрачјето СВР Скопје изречени се вкупно 217 решенија за изолација и над 400 решенија со здравствен надзор.
Од вкупно 3.250 изречени контроли на цела територија, вкупно шест лица не ја почитувале досега изолацијата. Тој додаде и дека поднесени се вкупно 39 пријави по член 205 и 206 од Кривичниот законик.