Донација на опрема од Американската амбасада во Македонија денеска ќе добие Пограничната полиција на Министерството за внатрешни работи и Царинската управа. Опремата, вредна 142 илјади долари, е обезбедена преку Програмата за контрола на извозот и гранична безбедност (EXBS).
Опремата содржи далекусежни двогледи, апарати за инспекција, пејџери за откривање на радијација, компјутери и опрема за симултан превод.
На предавањето на донацијата ќе присуствуваат министерката за внатрешни работи Гордана Јанкулоска и амбасадорот на САД во Македонија Пол Волерс.
Оваа донација ќе помогне во зајакнувањето на способноста на македонската Гранична полиција и на Царинската управа за вршење на професионална гранична контрола и за изведување активности на граничните премини. Донацијата ќе ја подобри способноста на двете гранични агенции да вршат надзор на границите, патроли и операции на пресретнување, како и да се борат со прекуграничен криминал и тероризам, да откриваат радијација, да идентификуваат оружје за масовно уништување и сличен материјал и да вршат примарни и секундарни инспекции на граничните премини.
На настанот ќе бидат изложени и некои примероци од донираната опрема.