Партијата ДОМ смета дека проблемот со зеленилото може да се реши само институционално со донесување закон за зеленило и зелен катастар.
– Ова е единствениот траен начин да се заштити постоечкото зеленило и да се зголеми неговата површина, наведува ДОМ во денешното соопштение.
Потсетува дека Комисијата за животна средина на ДОМ во соработка со експерти од оваа област изминатата година го подготвуваше предлог-законот за зеленило, според примерите од Германија и Австрија. Тој беше изготвен во јуни и за него започнаа стручни расправи со претставници од Град Скопје и скопските општини.
– Се очекува, по прецизирањето на одредени прашања и по отворена јавна расправа од сите субјекти во општеството, да влезе во собраниска процедура во септември, се вели во соопштението и се додава дека поддршка за законот очекуваат од сите пратеници.