По повод Светскиот ден на туризам, Демократската обнова на Македонија (ДОМ) потсети дека нема туризам без екологија и упати повик до туристичкиот сектор активно да се вклучи во акцијата за чистење што ја организира Министерството за животна средина и просторно планирање на 5 октомври.
– Како пратеник бев иницијатор на акцијата „Македонија без отпад“, заедно со колегите од ДОМ и невладината „Ајде Македонија“. Владата ја поддржа акцијата и лани се спроведе два пати, а се собраа вкупно 60.000 тони отпад. Акцијата „Македонија без отпад“ стана традиционална и годинава ќе се прошири на сите општини што се спремни да се вклучат. ДОМ и понатаму инсистира на развој на туризмот, зашто се покажа дека е огромна можност за нови вработувања и економски развој, рече на денешната прес-конференција претседателката на ДОМ Лилјана Поповска.
Насер Хот од Комисијата за туризам на ДОМ ги повика сите туристички работници, сопственици на хотелско-угостителски објекти, сопственици на помали приватни пансиони и други семејни бизниси во туризмот, туристички водичи и вработените во нив да се вклучат во акцијата „За чиста Македонија“.