Во општина Кисела Вода денеска беа доделени нови 50 решенија за утврдување на правен статус на бесправно изградени објекти. Од вкупно 11.871 поденсено барање за легализација, досега се завршени 1.486 предмети.
Решенијата ги врачи градоначалничката Билјана Беличанец – Алексиќ која ова го прави по вторпат откако ја презеде функцијата. Посочи дека тоа ќе стане пракса во општина Кисела Вода, која има најголем број дивоградби.
– Воспоставувањето урбанистички ред и успешно заокружување на процесот на легализација на дивоградбите во општина Кисела Вода претставува заеднички интерес за сите нас, рече Беличанец-Алексиќ.
Таа ги повика граѓаните кои се уште не ја комплетирале потребната документација тоа да го сторат што поскоро за да може во најкраток можен рок да ги легализираат своите дивоградби. Ги потсети и сите правни и физички лица на кои им е изготвена урбанистичка согласност во најкраток рок да го платат надоместокот, за да може да се продолжи постапката за изготвување на решенијата за легализација на објектите.
Во Општина Кисела Вода во административна постапка се 4.954 предмети, а 5.295 се незапочнати, односно се со нецелосна документација.
