Македонските граѓани кои сакаат да патуваат во Украина до 15 март следната година ќе нема потреба од вадење виза за краткорочен престој.
„Одлуката за укинување на визите ја донесе пред два дена украинскиот претседател, со желба за развој и практично остварување на принципите на добрососедско партнерство меѓу Украина и Република Македонија, интензивирање на билатералните контакти во сите области на заемни односи и потврдувајќи ја намерата да се продолжи соработката во сферата на либерализација на режим за заемни патувања на граѓаните“, соопшти денеска Амбасадата на Украина во Скопје.
Државјани на Република Македонија, кои ќе престојуваат во Украина до 90 дена во рок од 180 дена од денот на првото влегување, ќе влегуваат на нејзината територија само со важечка патна исправа без поседување визи, покани, односно други документи, предвидени со важечката билатерална Спогодба за заемни патувања на граѓани. Задолжителни се патничко осигурување и доказ дека граѓанин поседува доволно средства за престојот во Украина.
Одлуката нема да важи за оние граѓани кои сакаат во Украина да се вработуваат.
