Покрај деградацијата на кардиологот Никола Бакрачески и унапредувањето на д-р Зоран Донески, директорката на Кардиолошкиот завод „Св. Стефан“ – Охрид, Гордана Донеска, го прераспределила и единствениот специјалист по физикална медицина и медицинска рехабилитација, докторката Гордана Коњановска.
Решението на докторката ѝ било врачено пред две недели од службеник вработен во заводот, а образложението било дека директорот има право да прераспределува и дека во согласност со тоа право и видување таа има нова работна позиција.
Единствениот специјалист по физикална медицина и рехабилитација, докторката Коњановска, работела како раководител на одделот за рехабилитација, а сега е прераспределена на одделот за физикална терапија, што според систематизацијата е едно организациско ниво подолу.
Иако докторката е прераспределена пред една недела, нејзиното претходно работно место како раководител на оддел за рехабилитација сè уште не е пополнето и тој според правилникот може да го раководи само лице што има титула специјалист по физикална медицина и рехабилитација.
Докторката Гордана Коњановска веќе два мандата е дел од Советот на Општина Охрид. Извори блиски до болницата и директорката велат дека станува збор за политички реваншизам.
Специјалистот Гордана Коњановска ги потврди информациите за нејзината распределба, а директорката Донеска не се изјасни за овој случај бидејќи го прекина повикот.
Случајот за унапредувањето на сопругот на директорката, доктор Зоран Донески, ќе го испитува и атикорупциската комисија. Попладнево од Министерството за здравство изјавија дека детално ќе ја испитуваат работата на директорката Гордана Донеска, како и целокупната документација.
Сегашната влада додека беше во опозиција, жестоко го критикуваше ВМРО-ДПМНЕ и нивните функционери, кога тие разрешуваа и менуваа директори и раководители и истото го оценуваа како политички притисок.
К. Ландов