Вицепремиерот за европски прашања, Никола Димитров, спорот со Бугарија го нарече битка за македонската суштина и сржта на европските вредности од кои нема отстапување.
„Идејата на договорот беше историјата да им се остави на историчарите, за ние да се занимаваме со сегашноста и со иднината. Да ги решаваме билатералните прашања билатерално, без тие да бидат пречка на патот кон ЕУ“, напиша Димитров на Фејсбук, по интервјуто на премиерот Заев за БГНЕС.
Димитров вели дека македонскиот јазик и самоопределување, државотворноста и идентитетот не можат да бидат пречка за интеграција со Унија, која почитува културни и јазични различности како темелна вредност, ниту можат да бидат пречка за вистинско пријателство, бидејќи тоа секогаш се базира на взаемна почит.
„Ова е бесмртниот „вирус“ на идеали против кој залудно се бара „вакцина’“, напиша Димитров.
