Заменик-претседателот на Владата Никола Димитров денеска оствари работна средба со амбасадорката на Сојузна Република Германија во Република Северна Македонија, Анке Гизеле Холштајн, прва по преземањето на новата функција потпретседател на Владата задолжен за европски прашања.
Во фокусот на разговорот беше заедничкиот стремеж за влез во следната фаза од евроинтегративниот процес – одржување на првата меѓувладина конференција за формално отпочнување на преговорите на Северна Македонија со Европската Унија и тоа за време на германското претседателство со Советот на ЕУ.
„Блиску сме до целта, која што всушност ќе претставува почеток на најважното европско патување за нашата земја. Привилегија е што ја имаме Германија за пријател кој што ќе ни помогне да ја преминеме линијата на заедничкиот успех – првата меѓувладина конференција со историски предзнак,“ рече Димитров.
Амбасадорката Холштајн на Димитров му посака успех во новите предизвици кои што ја носат новата функција, потенцирајќи ги неговите заслуги за постигнувањата на Северна Македонија како на европскиот, така и на евроатлантскиот пат и истакна: „На агендата на германското претседателство во однос на вашата земја има конкретна цел – успехот кој што несомнено го заслуживте со напорната работа на европскиот пат, да биде заокружен оваа година.“ Таа додаде дека токму по одржувањето на меѓувладината конференција следуваат предизвиците: „Или како што вели германската изрека – тешкото започнува на рамно (Die Mühen der Ebene)”.