Македонскиот јазик и идентитет не може да бидат пречка за интеграција во Унија чија културна и јазична различност е вредност што треба да се почитува согласно Лисабонскиот договор, ниту пак македонскиот јазик може да биде пречка за добрососедски односи базирани на взаемна почит, порача вицепремиерот за европски прашања Никола Димитров на денешната прва средба со новоименуваниот амбасадор на Италија, Андреа Силвестри.
На состанокот Димитров истакнал дека Владата продолжува со обидите да се најде достоинствено решение, почитувајќи го притоа правото на самоопределување, во рамки на европските принципи.
– Но, европските интеграции не треба да бидат во заложништво на билатералните прашања. Европеизацијата на нашето општество, останува клучна цел на Владата. Реформите ќе продолжат бидејќи вистинската цел на пристапниот процес всушност е токму европеизацијата, внесувањето на европските стандарди дома. Во тој процес секоја помош од нашите пријатели ќе биде добредојдена, истакна Димитров.
Посакувајќи му успех на амбасадорот Силвестри во извршувањето на неговиот мандат, вицепремиерот Димитров изрази задоволство од билатерелната соработка и нејзиното понатамошно продлабочување. Од италијанска страна, како што стои во соопштението од СЕП, била реафирмирана силната поддршка од страна на Италија за европската интеграција на земјава.