Претседателот на Мaкедонското лекарско друштво (МЛД), Горан Димитров во изјава пратена до медиумите предложи итно донесување закон во Собранието кој ќе ги штити угледот, честа и животот на лекарите при извршување на нивната професија.
Според него, овој закон треба да има двојно поголеми казни за извршените деликти спрема лекарите и целиот медицинскиот персонал и истиот да биде спроведуван и истакнат во секоја медицинска ординација, амбуланта, болница.
Димитров го посетил доктор Љубомир Огњеновиќ, кој вчера беше ранет со огнено оружје на своето работно место во Одделението за дигестивна хирургија на Клиничкиот центар „Мајка Тереза“. Му изразил желби за побрзо оздравување.
– Сите лекари се изреволтирани од овој немил настан и случката која му се случи на колегата, кој во нашите круговии кај пациентите е омилен и претставува олицетворение на морална, етичка и хумана личност предадена на својата професија. Не заборавајте дека со нашата заклетва ние сме обврзани да помагаме и на човек кој претходно убил човек, човек кој што тепал дете, човек кој што удрил бремена жена во сообракајна незгода, стои во изјавата на Димитров.