Производители на мед од цела Македонија од денеска до сабота учествуваат на деветото издание на „Денови на македонскиот мед“ што се одржува на ул. „Македонија“ во Скопје.
На 30-те штандови посетителите може да дегустираат и да купат пчелни производи, како и да добијат и едукативен материјал.
Организатори на манифестацијата се здружението „Матица“ и Федерацијата на фармери на Република Македонија, под покровителство на Општина Центар.
Манифестацијата денеска официјално ја отвори градоначалникот на општина Центар Андреј Жерновски.
„Не залудно е речено дека медот е храна на боговите. Ми причинува особено задоволство да ја отворам оваа манифестација која треба да ја одржи традицијата за презентирање на пчелните производи“, им порача на посетителите градоначалникот на Општина Центар.
Жерновски додаде дека Општина Центар секогаш со задоволство ќе поддржува вакви манифестации.
Заменик-министерот Коњановски потенцира дека во Македонија има 108.000 пчелни семејства и дека поддршката на пчеларите ќе продолжи, а од нив се бара да произведат квалитетен мед. Во 2006 година во земјава, како што рече, имало 57.000 пчелни семејства.
Градоначалникот Жерновски истакнувајќи ја важноста на медот, порача до присутните да го вкусат прекрасниот мед и дома да понесат од овој корисен производ.