„Владата и Министерството за земјоделство,шумарство и водостопанство интензивно и посветено работи на отстранување на последиците од поплавите. СДСМ и нејзиниот поретседател на комисијата Дејан Павлески пред да излезат во јавноста со некаква наводна загриженост и препораки би требало барем малку да се информираат.
Како прво, општинските комисии веќе работат на проценките на штетите.
Второ, екипи и механизација веднаш беа и се уште се вклучени во санирање на последиците. Трето,Владата веќе се обрати до Европската комисија за обезбедување на помош за справување од последиците од поплавите од каде што е добиена информација дека во рамките на регионалните ИПА фондови има можност за добивање на финансиска помош.
Четврто, веќе е дискутирано со претставници од Европската комисија, ко-финансирањето на инвестициите од ИПАРД фондовите за настраданите земјоделски стопанства да биде зголемено на 85 % што значи обновувањето на производството да ги чини само 15 % од трошоците.
Владата и Министерството за земјоделство презема и други мерки за санирање на состојбите во загрозените региони. Исплатата на субвенциите се одвива редовно,а минатата недела беа исплатени сите лозари и поледелци кои ги исполнуваат условите,освен мал број земјоделци кај кои се вршеше редовната контрола.
СДСМ нема право да зборува за неисчистени канали и изградба на системи за наводнување . Тие не само што не ги чистеа каналите, туку и ги запуштија веќе постоечките системи,а вработените од водостопанските претпријатија ги оставија на улица. За разлика од нив,оваа Влада секоја година без разлика дали е сушна или врнежлива чисти по 140 километри каналска мрежа.
И на крајот сакаме да потенцираме дека Владата и Министерството за земјоделство заедно со Министерството за финансии е ангажирана во нај кус можен рок да се надоместат штетите нанесени на имотите, посевите и на инфра структурата во погодените реони. Поради тоа е формирана и меѓуресорска работна група која заедно со експерти од Светската банка ќе ја забрзаат проценката и исплатата на штетите“, се вели во демантот на Министерството за земјоделство,шумарство и водостопанство.