Делегација на Уставниот суд на Република Турција предводена од претседателот на Судот, Зухту Арслан и уште двајца судии и судија известител на Судот, од денеска до 12 септември престојува во посета на Република Македонија.
Претседателот на Уставниот суд на Република Турција, Арслан и членовите на делегацијата ќе се сретнат со претставници на Уставниот суд на Република Македонија.
Во текот на работниот дел уставните судии ќе разговараат на теми: „Уставната жалба во Македонија и системот на индивидуалната уставна тужба во Турција“ и „Тужбите пред ЕСЧП и одлуките против двете држави“.
Најавено е дека делегацијата на Уставниот суд на Република Турција ќе биде примена и од претседателот на Република Македонија, Ѓорѓе Иванов и од министерот без ресор во Владата, Аднан Ќахил.
Посетата на делегацијата од Уставниот суд на Република Турција е продолжение на одличната соработка со Уставниот суд на Република Турција и е во рамки на Меморандумот за разбирање и билатерална соработка меѓу уставните судови на Република Турција и Република Македонија склучен во 2007 година.