Светскиот ден за заштита на животните – 4 октомври денеска ќе биде одбележан и во Скопје со дефиле на миленици. Најшармантните миленичиња и нивните сопственици во Рамстор мол ќе добијат благодарници од стручно жири.
Одбележувањето на Светскиот ден за заштита на животните започнува во 1931 година, кога во Фиренца, на конференција на еколозите, е предупредено за одредени загрозени животни. Оттогаш, овој датум прерасна во Светски ден за заштита на животните посветен на сите животински видови, а последниве години е проширен и на недела на заштита на животните која трае до 10 октомври.
Овој ден претставува повод за бројни поединци и организации од сите делови на светот да предупредат на проблемите со кои животните се соочуваат денес, и да ги поттикнат луѓето да размислуваат за својот однос кон животните, потребата животните да се почитуваат и заштитата на животните навистина да стане важно општествено прашање.
Според податоците на светските организации, во светот секој ден исчезнуваат стотина животински видови, најзагрозени се морските желки, горилите, пандите, слоновите, китовите и тигрите.
Светскиот ден на животните е можност за секој од нас да направи нешто добро за животните од својата околина, да им даде дом, да ги нахрани и да помогне нивниот живот да биде поубав.