Институтот за стратешки истражувања и едукација – ИСИЕ во соработка со Правниот факултет на Универзитетот на Југоисточна Европа од Тетово денеска ја организираше третата тркалезна маса во рамки на проектот „Ќе има ли „свиркачи“ на универзитетите?. Дебатата се одржа во конференциската сала на Ректоратот на Универзитетот на ЈИЕ во Тетово, а целта на проектот што е финасиран од Европската Унија е да се предочат можностите на Законот за заштита на укажувачите во спречувањето на корупцијата во високото образование во Македонија.
– Досега направиваме споредбена анализа со странските практики за оваа област, но направивме и анкета со 513 од водечките четири универзитети во државата скопскиот, битолскиот, штипскиот и УЈИЕ во Тетово. Нашето истражување беше посветено на видувањето на студентите за корупцијата во високото образование, но и видувањето на можностите на новиот закон за спречување на корупцијата доколку постои. Тука ние добивме податоци дека само околу 7 отсто од испитаниците имале искуство со корупција на универзитетот каде студирале и тоа најмногу со обврската за купување на учебници како предуслов за полагање или положување на испитот изјави вонредниот професор на Правниот факултет „Јустинијан Први“ од Универзитетот Свети Кирил и Методиј во Скопје доктор Мишо Докмановиќ.
Тој посочи дка во истражувањето било воочено оти студентите и не се доволно запознати со законот за заштита на укажувачите донесен пред една година но и оти има критична маса за преземање на посериозни чекори во оваа насока.
Според вонредната професорка од Правниот факултет на УЈИЕ во Тетово Беса Арифи потребно е запознавање на студентите со можностите од овој закон за нивна заштита додека од друга страна мора да има вистинска реакција на институцијата каде ќе биде пријавено од страна на студентите или други лица дека имало одреден вид на корупција со цел преземање мерки за нејзино намалување и елиминирање.
По завршувањето на сите четири предвидени тркалезни маси во април следната година ќе има завршна конференција и публикација во која ќе бидат претставени препораките и можностите на универзитетите со внатрешни правила и практики да придонесат во спречувањето на корупцијата во високообразовните институции.