Премиерот на Србија, Ивица Дачиќ кажа дека Кумановската битка е историско предупредување дека балканските народи ги остваруваат најголемите победи кога се заедно.
„Тоа беше во Првата Балканска војна и тоа е една од ретките војни каде бевме заедно и кога не војувавме едни против други“, рече Дачиќ.
Тој рече дека нема ниедна причина Србија и Македонија да не развиваат поблиски односи „бидејќи се работи за две пријателски земји и два пријателски народи“.
Српскиот премиер рече дека во заеднички интерес е сите спорни прашања да се отстранат со заедничка соработка.
„Многу е значајно што денеска оваа свеченост е организирана и договорена со македонската влада. Тоа е многу позитивно“, оцени Дачиќ.
Во однос на најавите дека двете држави треба да се вклучат во решавање на проблемот меѓу МПЦ и СПЦ Дачиќ рече дека не знае дали црквите сакаат некој да се меша, но ако е така, тогаш владата на Србија е подготвена да помогне.
„Македонија и Србија имаат многу заеднички работи. Интересите ни се заеднички и сите проблеми треба да се решаваат по мирен пат и со преговори“, рече тој.