Сојузот за иднината вечерва на митинг ја бараше довербата за своите кандидати во Берово и Делчево.
Отворање откупен центар, проекти во инфраструктурата и развој на туризмот, најави кандидатот за градоначалник на СДСМ за Берово Звонко Пекевски пред беровчани.
– Со јавно приватно партнерство може да се отвори откупен центар за земјоделски производи во соработка со берзата на земјоделие во Струмица, капацитети за обработка на овошје и зеленчук.
– За развој на туризмот во делот како препознатлива туристичка дестинација планираме да се ревитализира Ловниот дом, како и обезбедување услови за развој на ловниот и риболовниот туризам, рече Пекевски.
Лидерот на партијата Бранко Црвенковски порача дека мора да се стави крај на, според него, неодговорната власт.
– Ова е земја пред колапс, ова е земја која беше економски лидер на Балканот, а сега е на дното, рече Црвенковски.
Тој додаде дека актуелната власт мора да се победи на 24 март.
– Тоа е можност за вашиот глас во еден ден да се брои двапати, да заврши две работи, да извојува две победи, укажа претседателот на СДСМ.