Околу три илјади верници се собраа денеска кај манастирот Покров на Пресвета Богородица на локалитетот Еленец кај каменичка Цера на голем црковно-народен собир.
Собирот е во организација на здружението на граѓани „Еленец-Цера“, а е поддржан од Општина Македонска Каменица и локални фирми и институции.
Портпаролот на општината Васко Десподовски соопшти дека е организиран ручек за три илјади гости и оти е организирана културно уметничка програма на која ќе настапат културно-уметнички друштва од Македонија, Романија, Унгарија и Србија.
– Како општина го поддржуваме овој традиционален црковно-народен собир, каде луѓето со векови доаѓаат на ова место точно на овој празник. За таа цел со наша поддршка имаме организирано настап на повеќе културно-уметнички друштва, а посетителите ќе имаат можност да уживаат во природните убавини на овој локалитет кадешто општината има доста инвестирано за да го наметне како туристичка дестинација, каде се спојува верското, духовното и природата, но и традицијата, изјави Десподовски.
Тој додаде дека манастирот „Покров на Пресвета Богородица“ кај Еленец, верниците го посетувале уште пред 1000 години.
– Постојат податоци дека уште од Римско време, верниците доаѓале на ова место, каде имало издлабена карпа и поставена икона пред која се молеле, а карпата стои и ден денес на Еленец и има света вода која верувале дека била вековита. Потоа овде се изградило мало манастирче веднаш до светата вода, за во 90-те години на минатиот век, манастирот да се изгради и да го добие денешниот лик, додаде Десподовски.
Пред пет години преку ИПА фондовите е изграден патот до Еленец, а се реконструирани и два од конаците кои се стари повеќе од еден век. Во минатото овие конаци ги користеле патниците кои одовде оделе на пазар во Кочани.
Црковно-народниот собир, кој традиционално се одржува на празникот посветен на Покров на Пресвета Богородица, ќе трае до доцните вечерни часови.