Прегласувањето на вториот круг во избирачките места во општина Центар започна со нерегуларности, односно со прекршување на изборниот молк, но и со уникатен обид за манипулирање со гласачите, стои во соопштението на ЦИВИЛ.
Како што с енаведува во соопштението на ЦИВИЛ, во текот на минатата ноќ или рано утрово, флаери и писма биле оставени во поштенските сандачиња и во влезовите на зградите насекаде низ општината каде што има прегласување, меѓу другите и во зградата во која се сместени канцелариите на Цивил.
Во едниот флаер и во писмото, од кое јасно се гледа дека е фалсификувано гласачите се повикуваат да излезат на гласање на 28 април, односно не денеска туку идната недела, а во другиот флаер граѓаните се повикуваат да не излезат на гласање, се вели во соопштението.
Набљудувачите, мобилните тимови и активистите на Цивил се распоредени на сите гласачки места на кои се прегласува денеска.
Во соопштението на ЦИВИЛ се наведува и дека на гласачкото место 2849 во 8.30 часот набљудувач на ЦИВИЛ бил попречен да ја извршува својата должност од страна на член на Изборната комисија, под образложение дека нема посебно овластување од ЦИВИЛ.
По долго убедување и прикажување на сите соодветни документи и акредитации набљудувачот, сепак продолжи да го следи изборниот процес, појаснуваат од ЦИВИЛ.