Потфрли протестот пред Кривичниот суд, на кој повика ВМРО-ДПМНЕ и лидерот на партијата, Никола Груевски.
Eкспремиерот на официјалната страница на Фејбук пред повеќе од 8 часа напиша „Повик до сите граѓани кои не се согласуваат со антидржавната политика на СДС да излезат на протест пред Основниот суд Скопје во 13:30 часот“.
На страницата на ВМРО-ДПМНЕ беше објавено: „ВМРО-ДПМНЕ ги повикува сите членови и симпатизери на партијата и сите граѓани кои не се согласуваат со антидржавната политика на владеачката хунта да излезат на протест пред основниот суд Скопје во 13:30 часот.“
Но, протестот, иако беше најавен на социјалните мрежи и на официјалната страница на партијата, не беше масовен. Денеска на протест пред судот излегоа едвај стотина поддржувачи, симпатизери и членови на партијата, меѓу кои, пријатели и роднини на дел од приведените.
Меѓу нив можеше да се забележат сопругата на ексминистерот и директор на БЈБ, Митко Чавков, Јасмина, која беше дојдена да даде поддршка заедно со синот Иван.
Но, освен неколкумина ексфункционери, заедно со лидерот на партијата, Никола Груевски, на собирот, не можеа да се забележат поранешните високи функционери на партијата, кои што беа на високи раководни позиции изминатите 10 години, како Гордана Јанкулоска, Зоран Ставрески, Миле Јанакиески, пратеничката Даниела Рангелова.
В. М.