Премиерот Зоран Заев денеска по повод кинескиот национален празник упати честитка до премиерот на Државниот совет на Народна Република Кина Ли Кечианг.
– Ми претставува особена чест и задоволство, во име на Владата на Република Македонија и во мое лично име, да ви го честитам националниот празник на вашата земја и да ви упатам искрени желби за сестран напредок и благосостојба на пријателска Народна Република Кина. Би сакал да го изразам своето уверување дека нагорниот тренд на развојот на односите, искрениот дијалог и размената на средби на високо ниво меѓу Република Македонија и Народна Република Кина, и натаму ќе продолжи, вели Заев во честитката.
Искрено се радувам, додава македонскиот премиер, на нашата средба во ноември во Будимпешта за време на претстојниот 6-ти Самит на шефови на држави и влади во рамките на соработката на НР Кина и земјите на Централна и Источна Европа, како и за можноста прв пат да се сретнеме и непосредно да размениме мислења за нови перспективи за натамошното унапредување на севкупната соработка меѓу нашите пријателски земји.